óhAPPið: einfaldari tjónaskýrslur með snjallsímanum
óhAPPið er nýtt app á vegum Áreksturs sem auðveldar þeim sem lenda í umferðaróhappi að leysa úr sínum málum. Fyrir þá sem ekki vita er Árekstur óháð fyrirtæki sem sérhæfir sig í vettvangsrannsóknum umferðaróhappa. Árekstur mætir frítt á staðinn og tekur ljósmyndir og vinnur tjónaskýrslu fyrir þá sem hafa lent í umferðaróhappi. Þeir senda skýrsluna síðan á tryggingafélögin og sleppur fólk því við vesenið að þurfa að díla við tjónaskýrslur og tryggingafélög.
óhAPPið, með sínu rándýra nafni, er sáraeinfalt app sem er hægt að nota til þess að setja sig í samband við Árekstur. Ef þú lendir í umferðaróhappi og ert á höfuðborgarsvæðinu geturðu náð beinu sambandi við Árekstur í gegnum appið. Þeir mæta á staðinn, taka myndir og skrifa skýrslu og sjá svo um að senda fullunna tjónaskýrslu til tryggingafélaganna. Verði umferðaróhappið hinsvegar utan opnunartíma Áreksturs eða annarstaðar en á höfuðborgarsvæðinu er hægt að senda þeim þær upplýsingar sem þarf til þess að vinna tjónaskýrsluna beint úr appinu.
Þar er einfaldlega smellt á takkann ‘Gera tjónaskýrslu’ og eru notendur þá leiðbeindir skref fyrir skref hvað skal gera. Í fyrsta skrefinu tekur á að taka tvær ljósmyndir af árekstrinum, í næsta skrefi þarf að setja inn persónuupplýsingar og í því síðasta eru grunnupplýsingarnar sem þarf fyrir tjónaskýrsluna settar inn. Appið sér svo um að senda upplýsingarnar og ljósmyndirnar til Áreksturs sem vinnur svo úr þeim og sendir fullunna tjónaskýrslu á tryggingafélagið þitt.
Það þarf ekki að eyða fleiri orðum í óhAPPið, því einfaldara gerist það ekki. Appið gerir nákvæmlega það sem það á að gera og er ekki með neinu skrauti. Það er reyndar fréttaveita á forsíðunni á appinu sem er tekin frá Árekstur.is. Hún hefur reyndar ekki verið uppfærð síðan í janúar, en með nýja appinu ættu fleiri uppfærslur vafalaust að berast. óhAPPið er gott að hafa á símanum fyrir þá sem vilja vera með öryggið á oddinum þegar kemur að umferðaróhöppum.
Appið er frítt og má nálgast fyrir Android á Google Play Store og fyrir iPhone í App Store. En er ekki komið í ljós hvort appið komi á Windows Phone, en miðast það sennilega að því hversu vinsælt appið verði.
Þjónusta Áreksturs er frí fyrir viðskiptavini Sjóvá, Tryggingamiðstöðvarinnar, Vátryggingafélags Íslands og Varðar.
