Samsung Surface borðið er 1,4 milljón króna snjalltæki – Myndband

[youtube id=”e-Hsh9XmpEA” width=”600″ height=”350″]

Simon kíkti nýlega í heimsókn í Samsungsetrið og fékk að skoða Samsung Surface borðið sem er þar til sýnis. Borðið er mjög magnað tæki, það er 40″ á stærð og skartar 1920×1080 díla upplausn. Borðið er með Windows 7 stýrikerfinu og er uppfæranlegt í Windows 8. Það ræður  við allt að 50 snertingar í einu og því geta margir notað það á sama tíma. Samsungsetrið var nýlega búið að fá borðið og því voru engin öpp á því önnur en Bing-leitarappið og stjörnukort. Með hverju seldu borði fylgir SDK (Software Development Kit) og getur því kaupandinn hannað sín eigin öpp fyrir borðið.

Tækið er ekki fyrir hvern sem er, enda kostar það 1,4 milljónir króna og er aðallega hugsað til stærri fyrirtækja. Borðið gæti hentað sérstaklega vel á bílasölu, þar sem hægt væri að sjá bílinn, skipta út litnum, breyta felgum og fleira í þeim dúr. Borðið gæti einnig hentað vel á flottum bar eða í spilavíti því hægt er að setja ýmsa leiki á það eins og t.d. þythokkí eða ýmis fjárhættuspil. Borðið er enn sem komið er ekki komið í nein fyrirtæki eða heimili á Íslandi, en samkvæmt okkar heimildum eru  mörg fyrirtæki mjög áhugasöm um borðið og er Samsungsetrið að leita að forritara til þess að sérhanna öpp fyrir borðið.