Hljóðnemavandamál í Galaxy SIII – Möguleg lausn?

Nýjasta flaggskipið frá Samsung, Galaxy SIII, virðist ekki með öllu gallalaust enda hafa margir kaupendur talað um vandamál tengd hljóðnema símans. Helsta vandamálið lýsir sér þannig í símtölum að viðmælandinn heyrir oft lítið sem ekki neitt í þeim sem hringir og röddin bjagast þannig að halda mætti að sá sem hringir sé staddur í stórri tunnu.

Eins og gefur að skilja er þetta vandamál ansi þreytandi til lengdar og eru fleiri umræður þessu tengdar stöðugt að bætast við helstu snjallsímaspjallborðin á netinu og fólk er að forvitnast um hvað það geti eiginlega gert í þessu.

Hér eru mögulegar lausnir á vandamálinu samkvæmt FixYa:

• Endurræstu símtækið og taktu rafhlöðuna úr í 20 sekúndur
• Ef vandamálið er enn til staðar þá skaltu tengjast þráðlausu staðarneti (e. WiFi) til að uppfæra hugbúnað símans (e. firmware)
• Farðu í “Stilling/Settings” sem finna má í forritavalmyndinni
• Neðst í valmyndinni skal velja “Um tækið/About Device” og svo “Hugbúnaðaruppfærsla/Software Update”
• Ef uppfærsla er til staðar skal velja “Uppfæra/Update”

Ef hugbúnaðaruppfærsla virkar ekki, þá þarf að núllstilla símtækið, en það er gert á eftirfarandi hátt:

• ATH – Byrja skal á því að taka afrit af öllum gögnum á símanum og færa yfir á tölvu, svo að ekkert glatist í núllstillingunni!
• Farðu í “Stilling/Settings” sem finna má í forritavalmyndinni
• Veldu “Afrita og núllstilla/Back Up and Reset”
• Veldu “Núllstilla símann/Factory Data Reset” og svo “Endurstilla tækið/Reset Device”
• Að lokum skal velja “Eyða öllu/Erase everything”