Hlustuðu á Eurovision í símanum í Perú: Ferðasaga

Að vera með snjallsíma á ferðalagi erlendis er algjör snilld eins og Axel skrifaði fyrir skömmu á Símon.is. Síðastliðið vor fórum við tvö pör í mánaðar langt ferðalag um Perú í S-Ameríku og ég verð hreinlega að segja frá því hvað það var frábært að vera með iPhone’inn í ferðinni. Þau forrit sem ég notaði mest eru talin upp að neðan. Allt eru þetta iOS forrit en sum þeirra eru einnig til fyrir Android.

Í upphafi ferðarinnar keyptum við tvö frelsiskort fyrir sitthvorn símann. Þannig gátum við hringt á milli án þess að það kostaði handlegg. Eins gátum við farið á netið gegnum roaming, sem virkaði reyndar ekkert of vel, þannig að við vorum fyrst og fremst háð því að komast á þráðlaust net. Það var ekki jafn slæmt og það hljómar þar sem þráðlaus net eru mjög útbreidd á þessum slóðum og töluvert auðveldara að komast á slíkt í Perú en á Íslandi.

Converter

Fyrst ber að nefna verkfærið sem ég notaði líklega hvað mest, myntbreytan. Gríðarlega þægilegt app, sérstaklega til að byrja með, meðan maður lærir á nýjan gjaldmiðil.
Ég hef prufað nokkur svona öpp og finnst þetta það þægilegasta sem ég hef fundið. Uppsetningin á appinu er mjög góð og öll notkun frekar auðveld og þægileg. Auk þess að segja manni hvað einn útlenskur peningur jafngildir mörgum íslenskum, þá er hægt að nota appið til að umbreyta öllum heimsins mælikvörðum. Sem sagt alhliða “converter” app.

Appið er frítt í App Store – sjá hér
Heimasíða framleiðandans

Google maps þekkja líklega flestir. Það er innbyggt í iPhone og er alveg frábært app. Verandi staddur í Perú var mjög þægilegt að geta flett upp einhverjum stöðum sem maður ætlaði að kíkja á. Ekki nóg með að forritið segi manni hvar staðurinn er, heldur segir það manni einnig hvernig maður kemst þangað, gangandi, akandi eða með almenningssamgöngum.
Það er algjört möst að nota Google maps á ferðalögum erlendis, rati maður ekki fullkomlega. Það eykur einfaldlega ánægjuna af ferðalaginu.

Með BlogPress skrifaði ég og birti bloggfærslur og leyfði þannig fjölskyldunni heima að fylgjast með ferðalaginu. Ég nýtti gjarnan dauðu tímana til að skrifa bloggfærslur í símann. Maður er eðlilega lengur að skrifa í símann en á lyklaborð. Lengsta rútuferðin var um 20 tíma keyrsla, þannig að það var nægur tími til að skrifa. Inn í færslurnar bætti ég síðan myndum sem ég tók á símann og vann með í Photo Lab (sjá neðar).
BlogPress appið virkar með öllum helstu bloggveitum (fyrir utan Moggabloggið) eins og Blogger, WordPress, Livejournal, tumblr., Windows Live Spaces og svona má áfram telja.

BlogPress kostar $2.99 í App Store – sjá hér
Heimasíða framleiðandans

 

Photo Lab

Þetta er ágætlega sniðugt forrit. Ekkert endilega það besta, ég hef hreinlega ekki lagt mikið upp úr því að finna góð ljósmyndaforrit fyrir símann. Þetta hef ég átt í nokkurn tíma og það dugar mjög vel til að skerpa á myndum sem ég hef tekið og ætla að birta á Facebook eða blogginu. Með einum smelli leiðréttir forritið sjálfkrafa birtuna, litina og fleira og gerir myndina einhvern veginn skýrari og flottari. Það skemmir ekki fyrir að þetta tekur bara örfáar sekúndur.

Forritið kostar $1.99 í App Store – sjá hér
Heimasíða framleiðandans

Internet RadioBox

Það er ekki hægt að segja að ég hafi notað þetta forrit sérstaklega mikið í ferðinni. Engu að síður notaði ég það og það sem meira er, það kom sér gríðarlega vel.
Kvöldið sem íslendingar tóku þátt í undanriðli Eurovision vorum við ferðalangar í fyrrnefndri 20 klst. rútuferð. Dömurnar höfðu mikinn áhuga á að hlusta á Eurovision á meðan við strákarnir héldum coolinu og vildum ekkert af Eurovision vita. Í rútunni var boðið upp á þráðlaust net þannig að ég reif upp símann, stillti á Rás 2 og leyfði stúlkunum að hlusta. Ég verð að viðurkenna að þetta var frekar töff, að taka upp símann í rútu langt upp í Andersfjöllum í einhverju þriðjaheimsríki og stilla á Rás 2 eins og ekkert væri sjálfsagðara.

Forritið kostar $0.99 í App Store – sjá hér
Heimasíða framleiðandans

Um Viber þarf í sjálfu sér ekki að fara mörgum orðum. Við fjölluðum um appið fyrir skömmu og má lesa þá umfjöllun hérna.
Það sem ég myndi vilja bæta við er að einfaldlega að leggja áherslu á hversu mikil snilld það var að taka upp símann á “Wi-fi zone” og hringja frítt í félagana á Íslandi, svo ég tali nú ekki um hversu ótrúlega góð hljómgæðin eru. Þetta app er skyldueign.

Forritið er frítt í App Store – sjá hér

og Market – sjá hér

Heimasíða framleiðandans

 

Foursquare

Foursqare var í mínum huga upphaflega eitthvað djók. Svo fattaði ég allt í einu að þetta er býsna magnað app sem getur auðveldað manni lífið.
Fyrir þá sem ekki þekkja er þetta app sem maður notar til að “tékka sig inn” á tiltekna staði (í raun hvar sem fólki dettur í hug). Sem dæmi má nefna að ég tékkaði mig inn á veitingastaðinn X í Lima, höfuðborg Perú, og fékk um leið meldingu frá einhverjum sem hafði verið þarna áður og mælti sérstaklega með heilsteikta naggrísnum (þetta er án gríns réttur á mörgum veitingahúsum). Svo kom appið sér líka vel þegar við ákváðum eitt kvöldið að borða sushi. Ég fletti því einfaldlega upp hvaða staðir í nágrenninu seldu sushi og hvað fólk sagði um staðina. Við enduðum á að borða eitt besta sushi sem við höfum smakkað, svo gott að við borðuðum þarna aftur kvöldið eftir.

Forritið er frítt í App Store – sjá hér
og Market – sjá hér
Heimasíða framleiðandans

Fyrir utan þessi öpp sem ég hef minnst á að ofan má ekki gleyma iPod-hluta símans. Þær eru mældar í tugum klukkustundirnar sem ég var með heyrnartólin í eyrunum hlustandi á hljóðbækur og tónlist.