Instagram komið á Windows Phone

Instagram er nú loksins komið á Windows Phone. Eigendur slíkra tækja þurfa því ekki lengur að fara krókaleiðir og nota eitthvað af þeim fjölmörgu öppum sem eru í boði frá þriðju aðilum til þess að komast á samfélagsmiðilinn. Instagram, sem var upprunalega bara fyrir iPhone notendur, kom á Android í mars 2012 og fjölgaði notendum úr 30 milljónum í 150 milljónir. Appið er mjög líkt iPhone og Android öppunum í útliti og býður upp á sömu möguleika, fyrir utan vídeoupptöku. Appið er víst ekki fullklárað að sögn Instagram en þeir vildu koma því út eins fljótt og mögulegt væri. Það er því merkt sem Beta til þess að láta notendur vita að appið sé í vinnslu og því skal ekki undrast að einhverjir hnökrar finnist til að byrja með.

Appið má nálgast á Windows Phone Store og er að sjálfsögðu frítt.